【再推就以後唔開】謝霆鋒埋怨紅館冇期 容祖兒急拆彈：千錯萬錯都係我錯
蘋果日報 2019/08/18 15:38
容祖兒謝霆鋒
容祖兒紅館演唱會昨晚去到第13場，請來謝霆鋒擔任表演嘉賓，並有狄波拉、側田、許晉亨父子、容祖兒弟弟和弟婦等捧場，祖兒介紹嘉賓出台時說：「如果張敬軒係靚仔，佢係超級靚仔，人平時好chok，但係佢有一顆溫柔的心，因為我見證過，而家我唱佢首名曲先，佢特登喺第二度返嚟撐我㗎！請用最熱烈掌聲歡迎佢。」
祖兒唱出霆鋒首本名曲《玉蝴蝶》後，兩人隨即相擁，祖兒對霆鋒說：「Hello！大佬，阿仔點解咁耐唔見你，你係咪喺北京忙緊？」霆鋒答：「唔係，我一路喺香港拍戲，前兩日就飛咗第度做嘢。」祖兒即鬼馬問：「我以為你喺北京過，你呢輪dry唔dry ？」連Chok王霆鋒都被祖兒問到有點尷尬。言歸正傳，祖兒正經謂：「好開心，佢係我家人，一搵佢就答應。」霆鋒笑說:「記得你搵我嗰日你病緊，我真係聽唔到佢講乜，唔知講咗三個咩字，其實我係估，我就話你唔好講嘢住，你要乜都得，唔緊要。佢啱啱話我特登返嚟撐佢，其實大家都知唔止我一個，全行仲有好多人都會撐容祖兒，因為佢係一個抵撐嘅人！」
聽完霆鋒一席話，祖兒掩面興奮說：「好感動呀！謝霆鋒同我講呢啲嘢。」霆鋒接着說:「我好衰，唔值得撐，我就唔㗎啦！」動聽得令祖兒也不禁帶點輕浮回答：「我知，你個人夠真，我哋由細玩到大，你成功時我戥你開心，我成功時你戥我開心，歌都有得唱啦『你快樂，所以我快樂』。」霆鋒似乎不懂回應，決定走開，祖兒趕緊呼喚：「做咩走咗去？」霆鋒笑問：「你幾時變得咁？」祖兒大笑說：「我幾時都咁，一個開心有安全感嘅環境，我就係咁。謝霆鋒一路好想繼續同大家開演唱會，你哋想唔想？」
觀眾即時起哄，霆鋒突然說:「話時話，我想同呢個空間講，紅館呢個空間，我入咗紙兩年，一次又一次被推翻，再推我就唔開啦。」祖兒可能怕霆鋒把話說死，即幫口降溫：「鋒哥，千錯萬錯都係我錯，唔好咁講，你知不知我呢個騷都拎咗好耐先有，無論等到邊一日，今年又好，下年又好，總之大家都會等你啦！係咪？」最後二人合唱《阿門》，祖兒邊唱邊對着觀眾說：「係咪好靚仔？不老的傳說呀！食咗防腐劑呀！」