其實TM100自發表之後,唔少香港用家已經虎視眈眈,而且TM100早於5月份已於歐洲開售,不過由於SIMLOCK所限,令到一眾水貨舖都「敢望而不敢入」。今次水貨到港,可以用勻香港各大網絡商,絕對乃香港用家喜訊!
黑色漆面夠型格
SHARP「處女下海」玩伸縮式機身,論外形已經令人流晒口水,黑色焗漆面機身相當有型,質感十足,掛喺心口收視率肯定勁過36D,不過唔同之處就係會多好多手指模,皆因黑色漆面極易印上指模,故此強烈建議帶多塊抹機布出街。實用性方面,推盡機身之後唔會「Lock」實部機,感覺「虛虛浮浮」,聽住電話重可以伸上伸落,唔係好實在。而機身設計則以簡約為主,機身並未有太花巧設計,推開機面鍵盤就齊齊整整放喺眼前,大大粒數字掣都幾好㩒,相反機面幾粒功能掣就較為細粒,手感只係一般。