香港係華人社會，對唔老利嘅嘢都好避忌，最怕錯買凶宅，即係發生過命案嘅單位，見到「污糟嘢」就唔好啦。早輪九龍灣德福花園一個曾發生五屍命案嘅凶宅，就由業主委託地產代理拍賣，結果因為冇人競投，最後收番。
讀者好記性，應該仲有印象，98年德福發生過五屍命案，一個風水佬假借「添壽」為名，實質謀財害命，喺單位入面殺咗5個婦孺，唔經唔覺都已經係10年前嘅事，但因為單案太轟動，好多人都仲記得。嗰個單位嘅業主喺舊年中用111萬銀買入，跟住租出當投資，據聞租客係外籍人士。

到上個月，業主委託忠誠地產集團拍賣，單位建築面積625方呎，底價145萬銀，呎價2320蚊。據負責人講，個價較市價低咗四成。雖然拍賣當日冇人競投，但唔代表冇人有興趣，拍賣前有十幾廿人打電話查詢，當中有七、八人係有意欲想買嘅，全部係華人，投資或自用嘅都有。
咁點解最後冇人吼呢？負責人話啲客嫌貴，希望底價120萬左右喎；亦有啲客唔知個盤冇銀行造按揭，加上個盤連租約賣，冇得睇樓，買家咪褪軚囉。
華華上過啲銀行網，試用估價服務，德福花園個凶宅單位，估價竟然係「零」，有啲甚至連個單位嘅冧巴都冇得揀。華華同地產代理朋友傾過，如果單位發生過大單命案，銀行通常都唔會提供按揭。至於一啲發生過小事嘅案發單位，有啲銀行都會膽博膽照按可也，但按到幾多成，就冇乜準則。

代理朋友仲話，家陣樓市好，拎出嚟拍賣都啱，因為市旺時買家冇咁計較，利好消息遮晒啲唔好嘅問題啦；用嚟投資嘅話，呢類單位真係算平。至於德福花園呢個凶宅暫時未知幾時再拍賣，若然下次拍賣可以145萬銀賣出，即係執到34萬銀。連凶宅都有錢賺，究竟係個市太癲，定係啲人錢多得滯膽生毛呢？

電郵：mailto:[email protected]