《頭條新聞》於上周五（14日）情人節播出新一季，第一集除了原本的三人主持吳志森、曾志豪、羅啟新，亦找來王宗堯、王喜客串，分別扮演「乾塘鏡」及「忠勇毅」，王喜亦有主持其中一節「驚方訊息」，諷刺警方的裝備比醫護人員還要充足，亦毋須駐守隔離營。

不過節目出街後翌日，警方向廣播處長梁家榮致函，批評《頭條新聞》漠視警方抗疫工作，更點名批評王喜主持的「驚方訊息」，港台節目製作人員工會回應警察公共關係科，指節目一向以嬉笑怒罵風格諷刺時弊，希望警隊正視批評。節目收到警方投訴後，有網民為表支持，呼籲要將第一集的YouTube點擊次數到100萬，短短7日間反應熱烈，至今日（21日）下午6時15分，第一集的點擊次數破100萬，留言不乏打氣聲音，紛紛讚節目一針見血。

通訊事務管理局周一（17日）回覆《蘋果》查詢時，指截至當日接獲200多個電郵投訴節目。萬幸《頭條新聞》未有受投訴影響，早前在FB向眾多支持者表達感謝之情，預告今日仍會有第二集，無綫今晚6時播出第二集，港台31於晚上8時播出，第二集一開始已繼續寸鄧炳強。

《頭條新聞》今晚播出這集無懼警察投訴，一開波就以警星飯局做話題，先寸鄧炳強與明星飯局，吳志森扮演的大帥投訴有人將飯局片段擺上網，被人網上公審，曾志豪反駁：「有老師喺私人戶口講唔啱聽說話，仲畀人炒咗。」

之後話題講到一班出席飯局的人沒戴 口罩 ，吳志森代鄧炳強解釋因為警察不夠口罩，要慳住用。但曾志豪反駁沒有口罩就不應同枱食飯，更寸警察「今日近距離，聽日要隔離」將話題與60位警員出席退休晚宴扯上關係。

鄧炳強講過「畀個大指公佢，為朋友赴湯蹈火，在所不辭」，節目食字變成「不遲」，再提到7.21當日，有兩名警員臨陣逃走，之後又遲到39分鐘才到元朗港鐵站。鄧炳強亦講過「睇成龍學做警察」，曾志豪在節目中問：「睇邊套電影，見到暴徒襲擊百姓，係會掉頭走，咁養生呀？」

鄧炳強在警星飯局又講到自己去區議會回答流利，是看曾志偉在亞視年代主持的《開心字典》。在今集《頭條新聞》中，羅啟新就寸爆鄧炳強，他一人分飾曾教授、林班長兩角，上演《擔心字典》。 曾教授說：「如果想好似我講嘢咁叻，就要睇《擔心字典》，我哋會講啲係深，但係好新嘅字，係用全新去演繹，全新去解釋嘅字。今日大家講一個好鹹嘅字，係『鹽』字呀！」

曾教授：「買咗啲鹽但係唔鹹嘅，我哋叫做……」林班長：「廢鹽。」曾教授：「學武嘅男人，買咗啲鹽但係唔鹹嘅，我哋叫做……」林班長：「武漢廢鹽（武漢肺炎）。」曾教授：「呢個唔講得㗎、唔講得㗎。」曾教授：「買咗啲鹽唔變壞，我哋叫做……」林班長：「鹽命長，講緊你呀！」

曾教授：「今日要介紹個『離』字，呢個字平時解作離開，不過今日代表隔離，我好驚呀！而家病房我哋叫佢做……」林班長：「隔離病房。」曾教授：「隔離嗰間屋我哋叫佢做……」林班長：「隔離中心。」曾教授：「係隔離單位先啱，隔離條友好型，我哋叫佢做……」林班長：「隔離型（營）。」

《果GYM》隨身播 　健身壹App過！