丙級政務官月薪逾12萬元，即係首席助理秘書長或助理署長級數高官，今年八個幸運「升」分別係陸嘉健、鄭港涌、周永恒、張淑婷、黃靜儀、何小萍、林靜雅同蔡敏儀，三男五女，反映政務官職系女盛男衰大勢。
據資深政務官講，以往每年最少有十幾廿人升職，舊年有15個人坐正丙級政務官，今年人數咁少，十分罕見。佢分析有兩個主要原因，其一係政府過去十年不斷縮減編制，削減丙級政務官職位，因此近年首席助理秘書長或助理署長職位多屬臨時性質，完成特定工作就取消；另一個原因係開新位難，事關開設首長級職位須獲立法會批准，又要「一換一」，為免遭議員批評，所以開新位可免則免。
中級政務官晉升陷入樽頸，有高官話最受影響嘅應該係約在96至98年入職嗰批AO，以佢哋有11至13年資歷計，舊時署理丙級政務官一年多啲就可望升正，但家陣前無去路，唔少人要原地踏步兩、三年。政府每年大約請30個AO，據佢所知，96年入職嘅AO仍有約四分之一人未坐正，97年就有大半在呆等，至於98年嗰批，除非係表現極度出眾超新星，否則短期內唔使奢望有得升。政務官排隊升職風光日子不再，資深政務官無不搖頭嘆息。