當年今日
關於我們

【爆相爆片】內地人為影相玩命 危站凌霄閣平台外圍

蘋果日報 2018/12/20 21:40

凌霄閣玩命爆相爆片

李小姐前日晏晝12點幾喺山頂跑步,經過凌霄閣一樓一間漢堡包店嗰陣,隔住玻璃見到戶外平台有3、4個男女企喺欄杆外面嘅平台邊緣戙腳架,估計佢哋係為咗影維港景色。李小姐覺得佢哋罔顧安全,攀越欄河走去冇遮冇掩嘅平台取景太危險。
李小姐出去平台睇吓,發現嗰幾個男女操普通話,相信係內地嚟嘅自由行遊客。李小姐話其中一個女人用欄河旁邊一條通去緊急出口嘅樓梯扶手借力,爬過圍牆走入平台,非常危險。嗰班人仲鼓勵其他同伴有樣學樣擒出去!而現場唔見有保安員,亦冇任何唔准攀爬嘅警告字句。李小姐話:「你嚟旅遊,如果唔小心跌咗落街,我哋納稅人要畀錢救你!」佢不滿旅客累己累人行為,同時覺得有關景點應該要做好保安措施。
山頂纜車公司同記者講,平台唔係畀遊客進入嘅區域,旁邊牆身高達1.59米,估計係有人擅自攀爬上高牆影相,牆身同欄河都有張貼告示提醒遊客請勿攀爬,有關方面日後會增加安全巡邏
empty
為咗影相,操普通話嘅遊客可以做到幾盡?(讀者李小姐提供)