特首參選人四出拉票，幾個勞工團體噚晚喺理大搞論壇，出席打工仔可以將訴求寫喺紙仔，再貼到寫有參選人名字嘅紙板飯碗上。豬狼猛開空頭支票，大家領教過唔少，邊會同佢認真？一於發揮創意啦。

有人寫畀唐唐，話「希望有更多課外活動」，明窒佢搞婚外情。畀狼振英就係「星島愛你」，夭心夭肺，不過仍有人寄望佢「誠實為香港做港督」，唓！香港邊度仲有港督呀，分明叫佢發夢返去舊時啫。至於何俊仁呢，個紙板飯碗幾「吉」，大家明啦。
唐唐嚟到睇咗啲訴求，一路睇一路笑笑口，唔通諗起課外活動那些年？八方問佢點達成呢個願望，佢先扮呆，後來話「係咩，睇唔到」。八方追問，佢先話「問返大會啦」。唐唐反問點解啲人畀CY嘅訴求咁唔同，八方問佢唔通都想《星島》關注吓，佢先識反應。唐唐話政綱印刷中，唔講實幾時公佈，聲稱唔係怕早公佈會俾人鬧喎。
CY畀人翻兜十年前醜聞，掛住拆彈，噚晚冇出席論壇，梗係啦，參加論壇嘅唔係選委。

一班CY支持者搞個CY之友組織叫「梁粉」，絕地反擊，今日下晝兩點喺尖沙嘴五枝旗桿舉行成立儀式，CY會親自到，同一眾梁粉食凉粉，仲會搞個「特首選舉，全民起動」簽名運動開展儀式。
「梁粉」搞手之一嘅伍婉婷話，CY粉絲今日可以自備凉粉，一齊撐佢。喺囉，今日凍凍哋，凉粉又黑色，CY一定明白大家雪中送炭。伍婉婷話，好多人喺西九醜聞後更加支持CY，「點解呢單新聞之前已出過，又會攞返出嚟？好唔尋常！對佢唔公平。」「梁粉」搞手除咗伍婉婷，仲有鄧咏駿，兩人分別喺灣仔同觀塘區議員。

mailto:[email protected]