郭羨妮今日喺石門為舞蹈學校擔任開幕嘉賓，囡囡Kylie亦係學生之一，已經學咗3年，經常參與好多大型跳舞比賽。郭羨妮話囡囡由2歲幾開始學爵士舞：「初初都係當玩玩吓，有時去啲商場表演，佢仲唔識認真，要望隔離個同學仔。佢o依家6歲，生日嗰晚去咗參加全港嘅大型舞蹈比賽，老公第一次陪我去睇，我哋緊張到不得了，好似我自己出場咁。」佢話囡囡最後都攞咗個銀盃，成績算唔錯。

今年43歲嘅郭羨妮之前講過想生多個，不過因為老公工作好忙，搞到冇時間造人，唔知仲會唔會再生小朋友？郭羨妮笑笑口話：「下世喇，初初都有諗，不過年紀大喇，不如專注喺個女度，我又可以做自己嘢。」至於暑假活動，郭羨妮話已經安排咗囡囡學唔同嘅興趣班：「太悠閒唔得，我又唔會帶佢開工，怕自己照顧唔到佢，不如畀佢學下自己鍾意嘅嘢好過。」

精選娛聞，喺晒《娛果》
http://fb.com/appledailyent