呢輪俾政改搞到頭擰擰嘅煲呔噚晚終於抽到時間同太太着住情侶裝出席仁愛堂周年慈善餐舞會，預祝情人節，主席顏寶鈴同一眾董事局成員梗係好高興。不過，煲呔先旨聲明不談公事，八方於是即刻轉移陣地去咗《鏡報》嘅酒會，徐四民老到要兩個人扶住，但係仍不忘同曾憲梓一唱一和發功狠批民主派唔愛國。
不過，佢除咗鬧，都有讚。得到徐老祝福嘅人包括煲呔，原來前日徐四民去到煲呔官邸參加春茗，噚日就馬上大讚煲呔訪京回港後，講嘅嘢好得體，又穩陣，即時成為徐老口中嘅下屆特首熱門。徐老話另一位理想人選係唐英年，至於梁振英，佢話經驗唔夠，等第四屆啦。
（圖）煲呔同身後嘅太太着住情侶裝出場，原來煲呔得到徐四民大讚係下屆特首熱門，唔怪得紅光滿面啦！
馬泉崇攝


傳真︰2623-9278
電郵︰[email protected]