當年今日
關於我們

【李八方online】傳聞689會再選特首?林鄭冷笑後回應

蘋果日報 2018/10/10 18:02

林鄭月娥梁振英特首連任李八方ONLINE

特首林鄭月娥發表第二份施政報告,外界關注佢如何「表忠」,會唔會增加到2022年連任嘅籌碼。事實上喺今日記者會上,佢被問到係咪有意連任特首時多次重申,「所謂2022年6月30號之後的事,係一定唔會影響我今日喺本屆政府的任何施政,講完」。
至於今次報告內容係咪想博取中央信任以連任時,佢就冇新嘢補充,只重申,「所有喺2022年6月30日,你哋預測會發生嘅事、唔會發生嘅事,係同我今日做行政長官為社會做事完全、完全無關」。
至於有傳梁振英或「捲土重來」再選特首,佢會唔會否感受威脅時,林鄭就冷笑咗一聲,未有正面回應;喺記者追問下先重申:「2022年6月30號之後發生的嘢,同我宜家嘅工作係無關。」被記者幾度逼迫都冇就跑馬仔問題洩露更多天機,林鄭果然好口密。
而事事都高度參與的林鄭月娥,與青年嘅溝通工作亦未假手於委員會,佢計劃將「與司局長同行」計劃擴展至特首級別,等高中生都可以擔當「特首工作影子」,近距離體驗特首工作模式,可能想年輕人近距離睇下,佢到底係咪一如傳聞「咁打得」?
去年改組而成嘅青年發展委員會則會推出「YDC青年大使計劃」,政府消息人士話喎,會為青年提供領袖及演講培訓,仲會講參與者擔任政府國慶等官方活動嘅主持,亦會篩選部分參加者到國際及內地知名學府進行培訓。政府亦計劃將「青年委員自薦計劃」常規化,日後每年兩次招募。
立會補選新聞,《蘋果》一網睇晒
http://bit.ly/appledaily1125