喺韓國勁受歡迎嘅小說《82年出生的金智英》，曾經獲得第41屆今日作家獎、兩性平等文化獎，呢本小說寫身為家庭主婦嘅女主角經常受到男女不平等嘅待遇同埋歧視，唔少演藝圈中人都有捧場。

不過近日有唔少女星就因為拜讀呢本書而被男網民圍剿，指佢哋係女權主義者，好似之前少女時代前成員秀英曾經喺節目上提及自己有睇呢本書，而受到部份男粉絲嘅批評，近日就到女團Red Velvet嘅Irene受攻擊，Irene喺日前嘅粉絲見面會中，回答粉絲問題時指自己有睇《82年出生的金智英》，之後Irene就受到網民攻擊，指佢係女權主義者，有男網民更直言對Irene好失望，仲話唔會再支持佢，有過激嘅粉絲仲有剪毀或燒毀Irene嘅照片，又喺網上留惡評。

唔少網民都力挺Irene，覺得睇乜書係佢本人嘅自由，唔可以因為佢係女性睇呢本書就指佢係女權主義者。事實上，除了女團成員捧呢本小說場外，其實就連總統文在寅、BTS(防彈少年團)嘅RM、「國民MC」劉在錫等都有睇呢本書，但因為女團成員就成為大家嘅批評對象，外界覺得咁樣唔多公平。

更多韓流，喺晒《娛果》
http://fb.com/appledailyent