38歲嘅黎諾懿喺2013年迎聚太太李潔瑩，由窮小子搖身一變成為「十億駙馬」。諾懿日前接受商台《1圈圈 星光背後》訪問時，亦有講番入行16年來嘅辛酸史。

02年訓練班入行嘅黎諾懿，一出道就拍《當四葉草碰上劍尖時》，仲做男主角，之後就被力捧為「奧運六星」之一。唔知點解，突然被調去兒童組，諾懿坦言當時諗過退出娛樂圈：「會唔開心，六星之後，會幻想自己唔係劉德華就係梁朝偉，開始有種感覺唔想做。」

諾懿透露之後有段時間，收入低到要住劏房，喺2011年仲諗住參加完湖南衛視節目《舞動奇跡》之後就轉行，佢話：「係諗過《舞動奇跡》之後就劈炮！因為都（入行）十幾年喇，作為男人，夢想係時候要醒嘅。又搵唔到食，事業時好時壞，我都要養家，都要照顧一下家人。」幸運地，諾懿最終得到冠軍，成為事業里程碑﹕「當我獲得冠軍後，所有嘅人與焦點就會睇得到我，之後就開始拍《愛回家》。」今年諾懿仲等到一個好機會，憑住劇集《BB來了》嘅葉致廷一角，再度人氣急升。

精選娛聞，喺晒《娛果》
http://fb.com/appledailyent