好彩壇主謝志峰搵到英文名RaeesBaig嘅碧華依幫手,等大家可以聚焦返去少數族裔嘅教育就業問題。芳齡超過25歲但唔肯講實際幾多歲嘅碧華依,已經完成社工系博士課程,家任職一間社會服務機構,今次係第一次做主持,表現幾淡定。對於網民嘅支持,佢好謙虛咁話,覺得仲可以做好啲。
學中文係香港少數族裔面對嘅困難之一,民間一直要求政府放多啲資源去幫助佢哋。中學時讀九龍區名校嘅碧華依自言幾好彩,喺學校可以揀學法文或者中文,本身係巴基斯坦人嘅爸爸支持佢學好中文,加上媽咪係中國人,所以佢克服到學中文嘅困難。
不過,唔係個個都咁幸運,政府亦一直漠視呢個問題。融樂會總幹事王惠芬同八方講,教育局副局長陳維安暑假期間,去一間有唔少少數族裔學生就讀嘅中學演講,陳副局用英文向住班學生話,學中文係好難o架,佢細時都覺得中文難,好彩佢parents送佢去外國讀書咋。出席《論壇》嘅Fatima亦話,聽過陳副局喺另一論壇話,中國人學英文都難o架,叫佢哋努力啲。