【韓流】睇片感動到喊!泫雅旺角騷落台送抱冧粉絲
泫雅
韓國「馬舞女」泫雅事隔5個月再襲港開騷,噚晚喺旺角麥花臣場館舉行由輝皇娛樂主辦嘅《2018 HyunA Music Party in Hong Kong – Lip & Hip》,泫雅身穿短裙喺台上性感熱舞,並與粉絲玩遊戲兼送抱,更多次落台同粉絲近距離接觸,好不親民,泫雅完場前更一度感動落淚。
泫雅噚晚演出多首人氣歌曲,包括《Lip & Hip》、《Change》、《How’s This》等,勁歌熱舞落力表演,佢亦有又抽出粉絲嘅問題回答。泫雅表示今次來港試咗雞蛋仔,台下粉絲知道泫雅鍾意食菠蘿,就推薦佢飲菠蘿冰,佢亦提到自己嘅Keep弗秘訣係少食多做運動。有粉絲就問泫雅會否拍劇或電影,泫雅就坦言自己演技唔得,場面搞笑。
期間泫雅抽中粉絲希望合照嘅字條,泫雅更主動表示到台下搵該名粉絲合照,雖然主持人一度稱驚混亂所以婉拒,不過泫雅為咗粉絲福利就撒嬌話想合照,最終該名粉絲就得以上台同偶像合照,令其他粉絲相當羨幕。
之後泫雅就揀出幸運粉絲玩遊戲,粉絲都相當踴躍舉手望偶像會揀自己上台,而其中一個遊戲要粉絲自轉10個圈,再行去攬攬泫雅,而泫雅就相當擔心粉絲轉完圈會頭暈行唔到,多次貼心提醒粉絲要小心。第二個遊戲就要粉絲跳泫雅嘅歌曲,勝出嘅粉絲就獲得泫雅準備嘅禮物,遇到唔識跳嘅粉絲時,泫雅就喺一旁做示範。有幸上台嘅粉絲亦趁機自拍及送禮物畀泫雅,泫雅亦有求必應。
泫雅感嘆今次粉絲見面會時間過得好快,並承諾會盡快再次來港見港迷,隨後大會播出粉絲準備嘅短片時,泫雅更感動落淚,粉絲就用韓文大叫「唔好喊」,泫雅亦指:「因為得到大家嘅愛,所以會一直努力表現好嘅一面畀大家,多謝,我愛你」場面溫馨。泫雅與粉絲大合照後,再獻唱《Bubble Pop!》為見面會作結,完騷後泫雅進行全場擊掌環節冧粉絲。
更多韓流,喺晒《娛果》
http://fb.com/appledailyent