著名物理學家霍金逝世，不少藝人在網上發文悼念，李冰冰轉貼霍金微博內容，感謝對方喺科學上作出巨大貢獻：「前不久才拜讀過你關於人工智慧的演講，學到很多。相信您只是飛向了群星，自由自在的暢遊宇宙。」而陳法蓉亦喺微博稱霍金係一代巨人，而唐文龍則轉貼霍金最後一則微博：「Respect!但願你終於可以自由自在去到你一生思維裡面無邊無際宇宙的每一個角落，親自尋找到答案⋯⋯」陳曉東及台灣歌手許茹芸貼出「雙手合十」圖案。

大陸TFBOYS成員王俊凱亦喺微博留言：「緬懷霍金先生，您永遠屬於宇宙星辰，您的教誨我也會銘記在心。」王俊凱去年曾拍咗一條1分鐘嘅影片，向霍金提問，並得到霍金喺微博拍片回覆，當時王俊凱指霍金教授多次建議人類探索移民外星，以延續地球文明，稱大陸年輕人都對於探索宇宙同未來充滿好奇，想請問佢哋「該做哪些準備」，同時喺探索未來及發展科技，應該如何保護傳統文化，之後霍金錄咗影片回覆，先感謝對方提問，霍金指人類對於地球破壞，正威脅住所有人，所以應該考慮探索其他有潛力嘅星球，以延續人類發展，但霍金並唔認為全人類會移到一個新星球，只能精選一啲確保可以生存落去嘅人先移居，至於去邊一個星球定居、計劃喺其他星球上生活，首先需有想像力，考慮未來將如何生活；霍金又指出發展科技之餘，並唔相信傳統文化將會消失，認為藝術同音樂係面向人類，對外來物種冇任何意義，唔需要擔心。