韓劇《Healer》男星池昌旭聽晚將會喺九展舉行首個香港粉絲見面會，而今日下晝，完成上海行程嘅佢，就率先飛抵香港為今晚喺新蒲崗舉行嘅見面會記招做準備。

雖然近日韓國爆出中東呼吸系統綜合症，但一眾香港接機粉絲仍然冇有怕，現場大部分粉絲都未有戴口罩，下午約3時，池昌旭由10多名保安陪同下出閘時，粉絲就情緒激動，走上前接近池昌旭。

池昌旭雖然有戴口罩，但未知係唔係太多太焗嘅關係，佢就將口罩拉到落下巴。出閘初時，池昌旭都有行近粉絲收禮物，同埋同大家揮手，令粉絲反應激動，池昌旭更因而被迫到寸步難行，其後佢就全程頭耷耷，保持微笑經大堂行落停車場上車離開。