韓國6人女團GFriend噚晚出發參加《Incheon K-pop Concert 2017》途中遇上車禍，導致成員Yerin右手尾指扭傷、其他成員遭受輕微撞擊，雖然冇大礙，但依然嚇親粉絲。GFriend車禍一事尚未平息，點知今日又有消息指9人女團DIA亦遇上輕微車禍，引起粉絲更加關注偶像嘅交通安全。

據知DIA今日為咗新碟《LOVE GENERATION》簽名會而出發前往京畿道高陽市，點知喺漢南大橋附近因經理人不小心駕駛，導致DIA乘坐嘅車輛同前面嘅車發生輕微碰撞，不過好彩成員冇受傷，9位成員隨即趕到辦簽名會嘅場地。由於DIA比原定時間遲咗到達現場，其所屬事務所就透過官方Instagram道歉並為遲到一事解畫。