韓星鄭雨盛今日到中環ifc主持歐米茄腕錶60周年展覽開幕儀式，同場出席嘉賓仲有周汶錡、郭秀雲等。鄭雨盛喺台上賣口乖，大讚手錶，更指賽車係每位男士嘅夢想，同手上嘅手錶一樣。完成台上活動後，佢又做走到fans堆中合照，非常親民。

之後鄭雨盛透過繙繹接受訪問，透露近日為拍攝《鋼鐵雨》經常做運動，所以瘦過以前：「很久沒有來香港，所以一到埗就吃了點心。而且跟合作過的導演劉偉強先生通過電話，打過招呼。沒有特別滿意身體那一部份，但還要多做運動改善身體。」目前身型健美，問到會唔會借機會喺電影中晒肌、露股？佢笑說：「作為演員不會給自己限制，只需要就可以。」對於感情生活，佢承認年紀已經不少，要些時間準備。

另外，周汶錡表示剛替細仔Avner搞完百日宴，佢話：「都喺同屋企人、好朋友一齊食飯，同一班人同一地點好公平。大仔Jacques下星期兩歲生日，星期日會同佢慶祝。」佢笑言囝囝未返學，所以未有朋友仔。又叮囑咗出席嘅友人唔好花費買禮物：「最多都係有個羊仔主題蛋糕，因為囝囝屬羊。我哋兩公婆好少花費買玩具畀佢，費事佢太易得到唔珍惜。好似現在啲玩具玩完一輪之後收埋，再拎出嚟畀佢玩，佢都係當新玩得好開心。」