「通常人哋都會覺得，你去選得美嘅都係搵個好碼頭嘅，冇諗清楚你自己條路想點行囉！」

20年前，即係1997年，點解韓君婷無啦啦走去選亞姐？原來要多謝無綫。

多謝無綫唔要佢。

18歲，韓君婷讀完F.4，走咗去酒店打工。三年後，即1996年，報名選港姐：「但係我唔入囉！因為我肥，同埋，你知啦，我又唔係名媛底，又唔係名媛嘅底，咁你好難參加到港姐。」

「反而，好好彩地，TVB turn down咗我。我中學畢業，我地址又唔靚，又肥胖。Anyway我覺得我係好彩嘅，我入唔到港姐。」

97年，韓君婷個「竹昇」同事提議選亞姐，嗰陣又green又young嘅韓君婷就打俾父母，弱弱地問下可唔可以參加選美啦，輕易過關！

咁其實韓君婷被無綫拒諸門外嗰陣，究竟有幾重磅？「120磅左右啦，我選亞姐都係咁上下。」咁選亞姐嗰陣有冇減肥？韓君婷露出一個「唔係嘛？」嘅表情：「佢(指亞視)望到你咁嘅樣，你嗰兩個月都唔會減到去邊㗎啦！」但後生女新陳代謝快，由入選亞姐到當選嗰刻，其實韓君婷已經瘦咗好多喇，足足瘦咗8磅。

呢8磅點減？由佢入準決賽開始加油：「我每日飲一盒脫脂奶，食一個橙。嗰陣我住天水圍，因為選美冇錢㗎嘛，冇收入，咁我就搬去哥哥度住，唔使交租，但每日都要捱兩個鐘頭車，由天水圍搭去荃灣，荃灣搭去彩虹，彩虹再搭去亞視(廣播道)。

「嗰陣時朝早四點要起身，四點半要出門，先趕到7點返ATV化妝；每晚12點走，搭廠車趕最後一班地鐵。返到屋企就兩點鐘，仲要落妝沖涼，每晚maxium瞓兩粒鐘。」沒有名媛底，韓君婷就係憑住參加三項鐵人賽嘅決心，希望有一線機會會贏。

咁當選之後仲有冇keep住呢張餐單？韓君婷露出「黑人問號？」表情：「我都贏咗囉！」

韓君婷喺亞姐總決賽得亞軍，一贏咗，馬上嘗到「職場體驗」：「第二日返工嘅時候，你就會知道你係第二同第一嘅分別喇。就算你整整吓頭都好，都會被人拉開你推你埋一邊，點解呢？就因為冠軍到喇，做咗冠軍先，你第二唔緊要喇。咁所以呢個體驗對於我嚟講好珍貴囉，因為人生裏面，我切切底底一次真係失敗，講真，鬼叫你攞唔到no.1 咩！」

短短5日，冠軍朱燕珍因為瞞婚被除名，結果戲劇性地韓君婷補上亞姐寶座：「蝕咗嗰晚，就係蝕咗嗰吓戴后冠同繞場一周嗰吓！」但因為佢口才了得，佢喺翌年頒后冠嘅時候，佢應該係唯一一個選美冠軍，要即場講成為之前一年嘅感受。

20年後，o依家韓君婷喺一間醫學美容藥廠工作，除咗培訓醫生點用公司產品，仲要做白老鼠：「我諗由初初入行啲人話我係白老鼠開始，到o依家其實係純熟嘅白老鼠囉。啱啱我做完對手，由一對骨感嘅手，變咗對貴婦手啦！」

「你話我有冇離開過以前嘅韓君婷，我冇！我完全其實都係嗰個人，只不過係一個進化嘅韓君婷囉。」

場地：高興
採訪：懷鈺、嵐山
攝錄：馮峰、Neo
攝影：陳慧安