當年今日

巴西佬唔啾唔啋唔握手
世盃球驗客:國足要到更衣室換波衫

蘋果日報 2002/06/10 00:00


國足雖然食咗巴西四隻光蛋,但係就贏咗口碑,同埋成功同對方某幾位出名球員換咗波衫。
喺前晚對巴西場波,班國足喺球證吹完場雞之後,就一心諗住同班巴西球員換波衫,點知班巴西佬又唔睬佢哋,手都唔握,就一支箭咁標番入更衣室;但係,有部份國足似乎重未死心,結果喺更衣室成功換到巴西球員嘅波衫。
據講,冇出場嘅范志毅就換咗卡洛斯嗰件,而祁宏同馬明宇就同咗丹尼臣同李華度換波衫。
或者有人覺得班國足咁做,似乎唔係太要面,不過一生人可能難得一次機會,同世界頂級勁旅嘅球星換波衫,唔爭取就笨囉。我求大俠就希望國足實現到佢哋換波衫嘅夢想之餘,喺禮拜四對土耳其嗰時,還廣大球迷一個驚喜,爭取第一球,甚至第一分。

雷哥斯達讓位閂定後門?
葡萄牙中場雷哥斯達日前話,如果教練覺得佢出場幫唔到球隊,實在唔介意冇正選打。雷哥斯達咁講聽落幾偉大,事關佢覺得自己唔弗,寧願讓個位出嚟。但係,葡萄牙如果今日輸畀波蘭,就會入唔到次圈,唔通雷哥斯達怕孭鑊,先至閂定後門。
「基」仔踢後備韋利有微言
意大利教練查柏東尼前晚對克羅地亞並無派恩沙基踢正選。想知基仔同韋利究竟度咗咩慶祝入球方式嘅球迷當然失望,而韋利事後話比賽前都以為會同基仔雙劍合璧,對教練安排有微言。韋利為咗基仔敢畀說話教練聽,呢份情認真令人感動。

俄新丁獲贈保時捷跑車
上場後備幫俄羅斯打贏突尼西亞嘅十八歲 仔施查夫,被國內球迷選為嗰場比賽表現最好嘅俄國球員,重攞埋贊助商送出價值六十幾萬港元嘅保時捷九一一跑車。唔好話我求大俠唔提醒佢,俄羅斯治安唔好就係人都知,如果佢第日真係揸出嚟,要有心理準備架車會隨時唔見。