中美貿易戰越演越烈，愛國愛港嘅建制派撐國貨嘅心也停不了，就好似工聯會咁吖，噚日去咗美國駐港領事館外示威，抗議美國逼加拿大拘留華為太子女孟晚舟時，順道呼籲埋市民多買國產品牌，以示對國家發展支持，但有份示威嘅工聯會陸頌雄，轉個頭就畀網民發現「口裡說不」，身體卻很誠實，同日就去咗旺角睇日本牌子Olympus相機，而唔係睇國貨，嘲諷佢係「漢奸走狗」。

八方問過一向都係攝影發燒友嘅陸頌雄，佢解釋國產鏡頭發展都仲係比較落後，選擇唔多，但Olympus性價比就好ok，系統細緻又唔貴，佢強調自己最後都冇買，只係window shopping啫，仲話買國貨撐國家企業自主創新，唔代表抗拒買其他嘢，家陣全球化自由市場，「唔相信有一個人可以剩係買自己國產貨，可以生活到」，最緊要係支持自由、公平、互惠嘅貿易。

日本貨唔怕睇，咁美國貨又怕唔怕買？陸頌雄就話：「唔會話刻意避免，但會優先採用國產，有啲產品國產唔係太成熟，無理由夾硬買唔啱用嘅嘢，我哋理智㗎嘛」。作為精明政治人，吖，唔係，係精明嘅消費者，陸頌雄優先採用嘅就係近日公司太子女被捕嘅華為出品嘅手機，「前日仲買咗華為平板電腦畀媽咪做生日禮物」，佢大讚華為出品，實屬佳品，「高質高質」。噢，而家要做到政治正確，果然出錢又要出力。