古天樂上月底因為喺屋企唔小心俾拖鞋絆倒跌落樓梯，搞到右手同右腳十字韌帶斷裂及半月板撕裂，傷勢都幾嚴重，原本佢本月初要開拍于仁泰執導嘅《一門忠烈之楊家將》，但因為受傷，部戲決定停拍等古仔好番再開。但噚日馮仁昭收到風，部戲聽日喺河南開機，古仔正式辭演啦！佢演嘅楊大郎角色會由鄭伊健頂替。

消完腫做手術

馮仁昭噚日打畀投資呢部戲嘅老闆黃百鳴，佢話：「原本係想等古仔好番先拍嘅，但醫生話佢最少一年唔可以拍動作戲，咁呢部戲有咁多動作鏡頭要拍，又要騎馬，古仔冇可能拍到，我同古仔商量過後，最後都係決定畀佢好好休養，換鄭伊健做佢個角色，而伊健原本嘅角色會畀邵兵做。」
下月中黃百鳴另一部賀歲片《八星抱囍》開拍，究竟古仔演唔演？黃百鳴話：「呢部冇動作，佢可以演嘅，下月中開拍後會先跳拍其他人嘅戲份，古仔戲份會延到最後先拍，等佢隻腳好番咁上下拍會比較好。」古仔家喺屋企靜心休養，出入都仲要用枴杖，等消晒腫後，佢會安排隻腳再做一次手術。