美股周四晚走勢和預期差不多，杜指連續第2支大陽燭急升，收11015，升198點。杜指20日線已下移至11051，看來周五晚未必能出現第3支大陽燭上升，就算能升破20日線，估計亦會受阻於100日線11131。
不過，港股昨日尾市挾得相當盡，恒指以貼近全日高位15842收市，大升408點。全周計，恒指升214點，升幅1.37%。
恒指本周走勢先低後高，周線圖出現錘頭，下周進一步反彈的機會頗大，主要阻力在20周線16037，未必能一舉升破，預期在15400-16000上落的機會較大。所以趙飛雲亦不作高追。
近年港股多咗對沖基金買賣，加上衍生工具如窩輪等愈來愈多人玩，港股的賭味亦愈來愈重。現時炒港股，睇中就要郁手，唔可以歎慢板，例如過去兩日美股反彈逾3百點，恒指更升近600點。
美股市場夠大，不容易出現裂口高開，要追貨尚有水位，但港股相對國際熱錢規模，只是小水池一個，要裂口挾高二三百點開市全無難度，以昨日為例，恒指裂口高開372點，大戶跟住全程力托，令升幅從未低於300點，散戶想買平些少都唔得，高追又怕接火棒，陷入進退兩難的局面。