寸查小欣死人炒魷乜都關佢事
梁思浩:理吓自己老公好過!

蘋果日報 2004/02/14 00:00


查小欣日前就梁思浩遭無綫放棄而召開記者會事件,發表了「公司冇話請你一生一世」言論,惹來梁思浩不滿,直指查小欣落井下石,更暗寸查小欣夫婿李學斌早年與女公關拖手出街之事,他說:「佢理吓自己老公好過啦!」
梁思浩日前因為不獲無綫續約而召開記者會,力數無綫無情無義;然而,商台節目《茶煲裏的查篤撑》主持查小欣,繼前日在節目中表示「公司請你嗰陣冇話明請你一生一世」之後,昨日她又在節目中發表意見說:「唔明點解梁思浩咁恨(着緊)呢份工,TVB又唔係畀三千萬一年,只係畀三千蚊一年之嘛!TVB裁咗七十人,咁係咪個個都要開記者會?其實𠵱家咁咪重開心,TVB唔綁住你,可以另闖新世界啦!」

「擺明落井下石」
查小欣的言論,令到梁思浩不滿,昨日他在電話中說:「查小欣咁講根本係落井下石,佢咁講唔單止係針對我,而係針對所有俾TVB炒嘅員工,所有被炒嘅打工仔。佢成日講到自己好似人民英雄咁,但竟然會講埋啲咁嘅說話,我係有啲嬲,相信所有俾老闆炒嘅人都會唔開心。死人又關佢事,炒魷魚又關佢事,唔該佢理吓自己老公好過!」此言似在暗寸查小欣夫婿李學斌早年與夜總會女公關拖手出街一事。

「對TVB有感情」
此外,昨日梁思浩返港台主持《瘋Show快活人》,對於查小欣指不明他何以對TVB工作如此着緊時,梁思浩即反駁說:「我喺TVB出身,對TVB好有感情,唔係吓吓講錢,我諗查小欣佢冇試過打一份好長嘅工先至咁講,可能係佢唔同人講感情啦,我想同決定炒我以及對我落井下石嘅人講句:『好容易他朝君體也相同!』星期一我會交番個員工證畀TVB,為支持TVB職員協會嘅黑衣行動,到時我都會着黑衫。」
對於梁思浩的指摘,查小欣昨日說:「我只係評論一個事實,自己係打工仔,好明白合久必分嘅道理,我講嘅係一個感受,如果有人要對號入座,咁無聊嘅人身攻擊我係唔回應。」
採訪、攝影:戴彩煥、駱華齡
empty
查小欣對梁思浩反擊不肯作回應。
資料圖片
empty
梁思浩建議查小欣與其多管閒事,倒不如多管束其夫婿李學斌。
資料圖片