家陣中環最渴市嘅係乜嘢人？答案：債券專才！無論係散戶定專業投資者，都認定人民幣投資有前景，其中人民幣債券就更加係由散戶到專業投資者都追捧。有求就有供，所以除咗銀行推出人債同人債基金，連股票行都要分一杯羮。
要推出人債基金，首先就要搵人債嘅專才。不過，喺香港莫講話人債，單係債券嘅專才都唔多，遠嘅唔使講，淨係華華嘅記者行家當中，有跑地產、銀行、股市，但就冇一個跑債券呢條beat。市場需求多，人才供應少，咁好自然要搶。
華華收到風，獲得中資股東入股嘅海通證券（665），都計劃進軍人債基金市場，分分鐘成為香港首家推出人債基金嘅證券行。甚至喺適當時間，推出更多同人債相關嘅私募同公募基金，落重本喺人債市場插旗。

海通債券部逾40人仍未夠

為咗部署推出人債基金，佢哋一早成立新嘅債券部門，上個月已經有四十幾個員工，仲會繼續加人手。
除咗海通，平保（2318）香港分支、恒生（011），仲有建銀國際都搶住推人債基金產品，好似上個月平保旗下嘅資產管理公司推出首隻人民幣債券基金。另外，巴克萊喺新加坡推離岸人民幣基金。要喺人債市場分一杯羮，當然要搵呢方面嘅人才幫手，華華暫時未知呢幾間行要請幾多人，但肯定掀起業界挖角潮，因為香港市場識得搞債券嘅專業人士有限，個個都要爭人，呢班專才人工睇怕身價都水漲船高。

李華華
mailto:[email protected]