當年今日

家長:個女身材靚咗我都想學
蹼水少年游出海豚美態

蘋果日報 2002/08/07 00:00


今個暑假,年僅八歲的呂菀珊和兩個姊姊,小小年紀便組成「蹼水姊妹花」,四出「蹼水」。年僅十一歲的駱經麟更是全港「蹼水」冠軍。他們的蹼水,與成年人因缺乏金錢四出「撲水」(搵錢)無關。口咬呼吸管、腳穿上蛙鞋,在水裏仿效海豚的泳姿,比大人們的「撲水」逍遙得多。
三年班學生呂菀珊說:「蹼水好好玩,蹼到好似海豚咁,蹼得快好多。」蹼水最講究腰力與腿力,在水中推動前進游出海豚美態,與日本惹笑電影《五個撲水的少年》的男生韻律操不一樣。
阿珊的媽媽呂太說:「經濟唔好,每年暑假都好頭痛,要搵慳錢暑假活動畀幾個女打發時間。」今年阿珊跟十三歲大家姐藹玲,與十一歲二家姐曉螢,一起參加蹼泳中心的訓練班。連呂太也羨慕女兒的玩意,「幾個女自從學蹼泳後,食量大咗,身材靚咗,我都想學,瘦身。」

一口氣浮潛半個泳池
去年暑假才學會蹼泳的駱經麟,去年九月參加全港蹼泳公開賽,在分齡賽取得三面金牌。阿麟的媽媽駱太說,去年暑假偶爾發現蹼泳班,有點好奇,以為是蝶泳,後來才曉得是模仿海豚的泳式。「阿麟好活躍,暑假唔想佢學壞,所以搵暑假活動畀佢。睇見蹼泳班,想個仔試下。點知佢愈玩愈鍾意。佢贏得金牌當然好高興,但係最高興重係睇住佢係咁長高,身體健康。」
「着起對蛙鞋,要學用腰力,兩隻腳一齊,一下一下咁擺動,好似海豚咁游水。個嘴咬住條吸氣管,要好用力咁吸氣呼氣。最初好唔慣,隻腳好痛,重飲咗好多水。習慣之後就覺得好好玩。」阿麟喜孜孜地介紹蹼水的方法。只見穿起蛙鞋的阿麟,站上跳台、躍進水中,一口氣便浮潛了半個泳池。阿麟的蹼泳教練朱鳳明表示,將準備參加上海的全國分齡蹼水大賽。
記者:林社炳