行會成員張炳良今年初接掌教院後，前日剛好上任100日，校方前晚請一班記者到教院與張炳良宿一宵，共度喺教院第100個夜晚，又去大埔墟陳漢記食夜粥。幾啖熱粥落肚，張炳良吐露「維新百日」感受，佢話外人視呢份工係燙手山芋，佢卻覺得校內同僚已經冷靜落嚟，可能事過境遷，大家當粉筆字抹咗算數。
當晚張炳良又帶記者夜訪學生宿舍，唔係「打蛇」或「屈蛇」，而係參加羅富國堂學生「傳統」活動──食雪糕，咁啱學生買咗個西瓜，一於由校長操刀師生分瓜同味。張炳良又向嶺大前校長陳坤耀偷師，逢禮拜三會同學生或老師食早餐，中國人愛喺餐桌上建立感情，唔知張炳良有冇預留時間做運動消耗卡路里？