王宗堯同女友蔡潔自從上年8月被《蘋果》影到喺數碼港公園sweet住咁玩航拍（新聞連結： http://bit.ly/2jQiGRb ），雖然未即時認拍拖，不過就醞釀緊。無耐認咗戀情，兩人仲喺Instagram貼咗張喺浴室嘅合照（新聞連結： http://bit.ly/2bqNUed ）。

王宗堯最近同歐錦棠合作舞台劇《科學怪人：誰主創造》，上個月初佢受訪時仲講過為咗套劇要閉關，少咗見蔡潔，辛辛苦苦終於喺噚晚完騷。不過……幾場演出女友蔡潔冇出現撐場，王宗堯嘅facebook似乎仲傳嚟壞消息，疑似分咗手。

王宗堯前晚先喺facebook留言話：「其實消失係咩玩法呢？」似乎意有所指搵唔到人，噚日佢再貼相兼留言，話：「First day back！三個月，一些些改變了，有些東西已經返唔到轉頭。」呢個留言，仲有幾個tag，例如係「還要去過生活」、「新生活適應中」、「2017 送舊迎新大行動」咁，言語間透露有啲嘢冇咗，唔知……係咪段感情無咗呢？而王宗堯嘅朋友都feel到唔對路，除咗留言安慰佢「去的就讓它隨著時間慢慢過去吧」仲有人直接了當咁問佢係咪分咗手，但王宗堯全部都冇覆。

至於女主角蔡潔都有跡可尋，佢一個星期之前，貼咗一張同女性朋友嘅相，不過留言嘅內容就可圈可點，佢話：「一定要記住，有些事就算不會到永遠，也值得你為它付出時間。」雖然唔知為咗乜咁講，但聽落有點傷感，唔知兩個人係咪講緊同一件事呢？

王宗堯今日回應《蘋果》：「暫時唔多講住啦，有啲嘢處理緊， 唔係好知點講，所以暫時唔想講太多。」