今日（11日）沙田八草兩泥賽事，草地用最狹窄之C加3跑道作賽，度地儀指數2.70，場地掛牌為好地至快地。今日將不會進行壓地。

睇番最近1月14日同一移欄草地賽事，當日度地儀指數2.71及掛牌好地，一及二檔包辦五WIN，而且頭馬全部在彎位守貼欄或二叠位置競跑，「銀城福星」、「一定賺」及「爭分奪秒」貼欄擺前帶到，就算後上之頭馬如「綽綽有餘」、「嬴風雲」及「恆駿寶駒」亦係彎位在內叠慳位留力，入直路才移出望空衝贏對手，走外叠馬匹好蝕底。

今日第十場「爭分奪秒」兩次跑田草C加3欄全勝，其他移欄未贏過，贏完等番福地再出可添食。第七場「怪獸家長」乃全場唯一贏過田草C加3欄之馬，憑較佳場地性能可秤先。

泥地方面，目前硬度計指數10.27及掛牌好地，泥地跑道於剛周二（7日）進行翻土工程，預期場地狀況與上周日（5日）賽事相同，當日兩場泥地賽頭馬「勇冠多」及「藍天堡馬」均放頭贏，所以頭場「安友」及四場「紅運精彩」等擅跑泥地之前置馬可優先留意。