郭晉安同歐倩怡06年喺香港迪士尼樂園舉行夢幻婚禮，婚後歐倩怡淡出娛樂圈，先後生咗一仔一女，一家四口過住幸福嘅生活(新聞連結： http://bit.ly/2FG2cKC )，不過早前安仔接受訪問，佢哋曾經因為專注照顧小朋友，令到夫妻間少咗話題，一度令婚姻出現危機，幸好經過雙方嘅挽救，最後總算雨過天晴！

歐倩怡今日喺大埔出席美食節活動，講到佢同安仔嘅婚姻雨過天青，唔知會唔會計劃同安仔去旅行過吓二人世界？倩怡話：「我好想呀，之前聽過阿女啲同學仔嘅媽咪講，雖然佢哋係做啲好困身嘅職業，而且仲係老夫老妻，但係佢都話一年點都要放低啲仔女，兩公婆去旅行，我聽完之後眼都大埋，我哋已經10幾年未試過！」

倩怡仲話：「初初大仔仲細，嗰陣都試過，我拜託媽咪幫我湊仔，點知媽咪叫我哋下次唔好再去，原來阿仔每日經過我房門走去拍門，拍咗好耐都冇人應佢之後，就好落莫咁去食早餐，真係覺得好淒涼又心痛，決定去邊都帶住小朋友。」

唔經唔覺，下個月係大仔嘅10歲生日，倩怡笑言覺得一額汗，時間過得太快：「快到好似有好多嘢未做，但係又好似MISS咗好多嘢，真係女人唔易做，我又想做啲自己想做嘅嘢，唔想全幅精神擺晒喺屋企。」之後又提到嗰段想離婚嘅階段，倩怡話：「唔知係咪老夫老妻症候群，你會發覺好似好習慣嗰個相處模式，話題係解決小朋友嘅生活事，所以我覺得要效法同學仔嘅家長，兩公婆要一年一次去旅行！」

諗法當日出現問題嘅日子，佢話：「覺得好冷漠，好似同屋主一樣，話題係個仔你接定我接放學，其實唔應該係咁。覺得錯過咗好多二人世界相處，o依時會重質不重量，安仔要開劇，我返學都好忙，會再嚴重聚少離多，但係安仔話會每星期最少約我一次去食燭光晚餐或者去食自助餐，可能又行吓街，大家開始磨合返，始終咁多年，唔會咁輕易放棄。」

精選娛聞，喺晒《娛果》
http://fb.com/appledailyent