韓國「國民MC」劉在錫於2008年跟MBC播音員羅靜恩結婚，長子智浩於2010年5月出世，前年追女成功，榮升一家四口幸福家庭。智浩不經不覺已經9歲多，劉在錫日前在最新一集《Running Man》（RM）中，就提到自己被囝囝嫌英文發音差，引起爆笑。

《RM》該集播出新年特輯，眾成員逐一發表自己的新年願望，HaHa率先表示自己新年想讀書：「大仔Dream以前以為我英文好叻，不過最近知道我英文其實冇咁好，所以想學習返。」劉在錫就立即表示有同感：「以前我都有讀英文童話書畀智浩聽，不過智浩7歲左右，佢就話我因為發音唔好，叫我唔好再讀，之後我就冇再讀過畀佢聽。」