「求學不是求分數」，廣博嘅知識可以豐富個人內涵，但有唔少人將求學同求財混為一談。
剛畢業嘅blessed_07喺《MSNBC》討論區問：「好多人話讀大學攞個學位返嚟，根本唔可以代表啲咩，咁點解仲有咁多人迫仔女上大學，借落大筆學生貸款？」佢又話有好多朋友雖然冇高學歷，但出咗嚟社會大學工作之後，唔單止有樓有車，收入仲高過自己好多。
Yadgyu回應：「好多人話讀大學係成功象徵、係唔少美國人理想，但我認為成功考入大學嘅人之中，有四成都係嘥時間，根本冇理想，亦唔知自己將來想做乜，只係想攞個學位。當然，讀大學唔係一件壞事，讀完的確可以令你容易啲入大機構做嘢，但唔代表將來一定係成功人士。」
followthemoney亦同意，「有啲人大學畢業出嚟做嘢，以為自己好巴閉，肆意批評公司嘅一套有幾唔掂，雖然話後浪推前浪啫；但喺現實世界，經驗先至係最重要，要成功上位，就要識得用唔同角度去睇一件事、解決問題。」

DoubleTap就話：「𠵱家教育水平高咗，單有學士學位都唔夠，最好喺踏出社會工作後4年內，快啲攞個碩士學位，例如MBA先至有競爭力，但記緊要揀所屬行業公認最好嘅大學。講真，如果你想將來有富足嘅生活，一係自己搞生意、一係讀多啲書。」bobtn亦認同：「教育水平太低，一旦失業就好難搵到新工做。」
咁又係，一年有咁多大學生畢業，要突圍又點可以單靠一紙證書喎！