周國賢今日喺科學園為《我們正在音樂節2018》擔任表演嘉賓，有近千樂迷到場支持。

周國賢喺台上感謝主辦嘅何韻詩：「我哋認識咗好多年，由14年前嘅舞台劇開始、互相寫歌、默默支持，我喺佢身上學咗好多嘢。」

台灣閃靈樂隊原定聽日喺音樂節演出，疑因政冶取向，而遲遲未獲批工作証，最後搞到要取消演出，何韻詩喺網上透露，周國賢見到有單位嘅演出要取消，所以主動提出聽日再唱多一場。

完騷後，周國賢接受訪問，問佢係咪因為閃靈樂隊嚟唔到香港，所以主動加場？佢就話：「錯，係因為反應比我想像中好，我聽日應該會着少啲衫嚟，聽日一定烈日當空。」至於閃靈樂隊係咪因為政治問題嚟唔到香港？周國賢話：「我唔知，但係我閃咗一個念頭，因為佢哋係樂隊。最近我首歌《錢七》，令我諗起好多以前夾band嘅嘢，自從零八年冇玩Zarahn之後，都已經10年啦，係時候做番啲嘢。」

問到好友何韻詩因閃靈樂隊未能演出而失望，周國賢就避談，佢話：「我希望下年Zarahn做到先。」佢仲話希望香港可以有更多呢類型嘅音樂節。

精選娛聞，喺晒《娛果》
http://fb.com/appledailyent