【本報訊】新地（016）今日賣樓，長實（001）唱淡樓市贈興。長實執行董事趙國雄上月仍看好後市，指樓價有力再升，但昨日卻忽然轉軚，指現時部份新盤開價過高，超出一般市民負擔範圍，現時投資買樓風險亦很大，而受外圍及政策因素影響，下半年樓價有下調壓力。

長實昨日在中環一間餐廳舉行記招，先公佈旗下將軍澳日出康城2C期項目已取得預售樓花同意書，下月開售，價錢會參考同區二手價。講完賣樓，有記者問趙國雄怎看下半年後市，他指因為政府不斷出招，「呢一輪都靜番好多」，長實過去一星期只售出十多個單位。稍後開賣將軍澳樓盤，正研究多項促銷方法吸引買家，「價錢方面或者會優惠啲」。
長實突然唱淡樓市，一名不願透露姓名的發展商指，「新地今日賣樓嘛」。理工大學建築及房地產學系教授許智文指出，下半年長實自己都有很多樓要賣，無理由唱淡後市，新地賣樓，長實搞小動作都不出奇。
趙國雄昨又多次提到自己「睇唔通」後市，「十幾年都未試過咁睇唔通」，所以長實會「快啲賣樓，仲要賣得快好世界。」樓市風高浪急，趙國雄認為現時投資風險好大，自住可考慮，但要量力而為。樓價方面，趙國雄認為其實樓價現水平已經不是太多人買得起，所以覺得復建居屋是好事，市民多個機會上車。

近年新盤越賣越貴，發展商不斷為樓市撥火，趙國雄昨日亦費盡唇舌，希望政府收手不好再出招，「我哋會盡量低調啲，賣到樓都唔好話賣咁多，（樓市）太暢旺，政府又收緊啲……」。「政府仲有好多招擺喺袋，不好逼佢，否則大家（發展商）經營環境仲困難。」
英皇國際（163）執行董事張炳強表示，「升咗咁多跌都好正常，但我冇水晶球，不知跌幾多」。
新地代理執行董事雷霆則指，樓市基本因素不變，低息及通脹，後市仍看好。

．十幾年都未試過咁睇唔通個市，所以要快啲賣樓（新盤），仲要賣得快好世界

．政府仲有好多招擺喺袋，唔好逼佢，否則大家（發展商）經營環境仲困難

．個人唔希望（樓價）再升，再升好多人都買唔起，其實樓價現水平好多人都唔能夠負擔

．個市繼續咁癲法，最大顧慮係政府出手

．我哋會盡量低調啲，賣到樓都唔好話賣咁多，（樓市）太暢旺，政府又收緊啲，發展商唔希望見到，所以我都唔想個市咁暢旺

．呢一輪靜咗好多，嚟緊賣樓都要諗吓計，例如價錢方面或者會優惠啲