下屆特首熱門候選人梁振英（CY）近期密集曝光，噚日去咗全港最窮地區之一嘅深水埗，探望三個住喺板間房同籠屋嘅居民，聽吓佢哋訴苦。CY話香港有錢人同窮人差距好大，又話板間房同籠屋係香港污點，特區政府未來工作會積極鏟除呢啲環境極惡劣嘅居所。講就好聽，但都係泛泛之談，一眾板間房同籠屋居民自然失望而回。

施政報告前出動

深水埗舊樓多又冇電梯，CY行樓梯又上又落行到氣咳，大汗叠細汗。
咁辛苦都要落區，有記者就問CY趁特首星期三發表施政報告前落區，係咪想改善民望，CY當然唔答咁敏感嘅問題啦，即刻將個波交畀邀請佢嚟嘅社協何喜華。何生亦都好識做，話原本想請CY下周日國際貧窮日先嚟，但CY多嘢做先改咗噚日，叫記者唔好咁多心喎。
另一個更加敏感問題，就係特區政府點睇劉曉波攞諾貝爾和平獎。記者問CY板間房同籠屋問題同劉曉波被囚禁係唔係一樣唔公義，CY避得就避，只係講咗句解決房屋問題唔可以同社會其他問題相提並論，連劉曉波個名都唔夠膽提呀陰功。