【身在福中...】玲瓏浮凸吸引異性? 崔碧珈稱自爆疑因身材豐滿而分手
鄧洢玲崔碧珈
36G崔碧珈今日喺柴灣擔任由鄧洢玲(阿旦)、梁梓禧主持ViuTV節目《晚吹 - 啪啪聲,太好聽》嘉賓
36G崔碧珈今日喺柴灣擔任由鄧洢玲(阿旦)、梁梓禧主持ViuTV節目《晚吹 - 啪啪聲,太好聽》嘉賓,經常谷胸上陣嘅崔碧珈竟然密實現身,被32E嘅阿旦穿上吊帶性感短裙揮低,阿旦解釋:「係節目效果先著得SEXY少少,喺節目入面,我要S姿勢瞓喺梳化度,瞓到腰骨痛,超攰!」阿旦表示自從主持《晚吹 - 啪啪聲,太好聽》後,由尷尬變成唔尷尬,直至o依家唔知醜。有冇人叫佢做「性女」﹖佢話:「好彩冇,但我喺性方面嘅資訊係豐富咗。」
崔碧珈就表示擔心同阿旦正面交鋒一定輸,佢仲話:「我今日係作客,唔係主持,如果我著得性感,啲人唔會留意我講乜,所以我今日會喺話題上出啲,例如大胸女仔有冇障礙,同伴侶親熱嘅時候有冇障礙,不過我就未試過有障礙,我做運動會戴運動胸圍。」
男友係咪鍾意大胸﹖現時單身嘅崔碧珈就話:「佢哋通常都唔抗拒,不過我以前有個男朋友,佢鍾意好瘦嘅女仔,個胸唔好太大,所以我為咗佢去減肥,但都唔係佢想要嗰種骨感,到最後我哋都係分咗手,我唔知係咪為咗呢樣嘢。」大胸係咪容易吸引異性﹖佢話:「都會,尤其係情人節,佢哋都會鍾意情趣嘢,鍾意靚睡衣,如果你身型夠玲瓏浮凸,男士都會鍾意啲。」有冇準備靚睡衣過情人節﹖崔碧珈笑住話:「平時我都會著嗰類型嘅睡衣,所以冇乜驚喜,好似我今日咁著,大家就覺得驚喜。」佢透露情人節會同女性朋友買餸返屋企煮。
提到崔碧珈主持ViuTV節目《胸X計》時喊,佢解釋:「呢個節目去到好盡,我喊係因為成pat頭髮都係麵粉,我要沖咗兩個鐘頭涼,點知成班工作人員刻意等我,導演話想拍埋我濕頭、唔化妝嘅take,為咗真人騷,除咗走光,我乜都拍。」好高酬勞﹖佢話:「合理,冇加錢,但請我食飯,我向來做嘢都唔會睇價錢。」