呢個世界可以抵押的資產真是無奇不有。意大利有間芝士公司就用巴馬臣芝士作抵押，發咗600萬歐元芝士迷你債（Parmesan-backedbond），仲每年固定派息5%，到期日於2022年1月，所得資金將會用作改善設備和推廣厚皮芝士咁話。

據《路透社》報道，呢間意大行公司叫做4MadonneCaseificiodell'Emilia，公司網頁上指有45個員工，65個合作農場提供牛奶，每年出產70,000舊巴馬臣芝士，佔全球巴馬臣芝士產量2%，而公司出產的ParmigianoReggiano為巴馬臣芝士中最頂級。

點解連芝士都可以用黎發債呢？因為意大利95%的企業都是超小型企業，員工數目不多於10個，過往一直靠銀行貸款融資，但過去幾年經濟轉差，不少小型企業借貸變成壞賬，拖累有實力的小型企業借錢都困難重重。政府就諗橋，等企業可以借錢壯大盤生意，從而刺激經濟，去年意大利的經濟就成功增長到0.8%喇！

不過，要搵評級機構去為芝士債評級都唔係一件易事，你估寫淨係寫個食評咁簡單咩，仲要顧及好多奇怪風險，例如芝士變壞、鼠患等等，到底會唔會影響件資產，啊唔係，係芝士的質素。所以，芝士債可唔可行、會唔會爆，我唔知，我真係唔知，但係就算爆都有得拎返啲芝士食下嘛！

掌握財經生活資訊，即Like「蘋果ATM」fb專頁啦！
http://fb.com/appledailyatm