馮仁昭四圍超:小雪失勢師妹爬頭位

蘋果日報 2002/01/31 00:00


唱片同經理人公司每年都會印製新年月曆,從呢啲月曆嘅擺陣,就知道今年邊個被力捧,邊個失寵。
好似馮仁昭啱啱收到羅傑承嗰間亞洲第一唱片公司嘅月曆,做月曆封面嗰個竟然唔係公司嘅阿姐小雪,而係一個叫關心妍(阿Jade)嘅新人。驟眼睇阿Jade外形有啲似小雪,都係眼大大嘅靚女,不過佢就比師姐小雪有型啲。

屈就排二月
被傳失寵嘅小雪,今年真係地位難保,除咗俾阿Jade踩住,冇得做月曆封面之餘,重要屈就排喺二月,一月個頭位都要讓埋畀阿Jade。唯一嘅安慰係小雪喺月曆出現嘅次數同阿Jade一樣。
聽講阿Jade喺加拿大參加過全球華人新秀歌唱大賽,重攞咗冠軍,之後又代表加拿大去上海參加歌唱比賽,攞咗最具潛質新人獎。聽聞佢又識玩樂器,都幾有料㗎。

成龍頸鏈贈韓女歌星
成龍前日去咗台灣,為佢隻全新大碟造勢。碟中佢除咗會同鄧麗君、藤原紀香同鄭秀文合唱外,重會同韓國人氣女歌手李秀英合作。為咗表示對李秀英嘅重視,成龍噚日喺記招重親自送咗條頸鏈畀佢。
成龍話有成六年冇出碟,錄音嘅時候比一般歌星辛苦好多,尤其係對住空氣同鄧麗君合唱《我只在乎你》。
張國榮點名與宋承憲合作
早排韓國女星宋慧喬嚟咗香港,哥哥張國榮即刻約佢見面,重點名要搵佢一齊拍徐克嚟緊開拍嘅大片《三少爺的劍》。原來哥哥係一個韓劇fans,佢欽點完宋慧喬之後,重睇中韓國人氣小生宋承憲。聽講佢因為睇完宋承憲嘅《藍色生死戀》之後,覺得佢幾好,所以就向徐克推薦。聽講徐克下個月重會專程飛去韓國同佢哋會面,傾吓合作細節。

余文樂入樂壇拍拖受壓
盧巧音(Candy)個男朋友余文樂,大前晚喺台灣專程返港捧女友演唱會場,睇到半場就走人。馮仁昭知道佢係去咗環球唱片公司試音,而唔係之前報道所講嘅Sony。
梗係啦,唱片公司想簽佢,無非係sell佢個靚仔樣,出嚟對撼今年英皇班男新人啫,所以近來佢同女友Candy開始受壓,唔可以再咁高調拍拖,等余文樂留番啲幻想畀班靚妹仔,所以佢唔會同女友喺埋同一間唱片公司。

Shine獲EMI重鎚力捧
EMI最近要力捧一隊二人組合Shine,呢兩個男新人,一個好似金城武,一個似郭富城。佢兩個都幫年代簽咗經理人約,然後再畀EMI訓練,早排就去過日本學唱歌同跳舞。EMI視Shine為秘密武器,準備用嚟打英皇啲新人,而年代老闆邱復生同台灣嘅福隆老闆娘萬福鴻都睇好呢兩個新人,話明要用全力捧紅佢哋。