【本報訊】近日歌手麥浚龍新歌《羅生門》在網上熱爆，歌詞講述一個男生被了結一段十年情，專責青年事務的劉鳴煒昨坦言未有聽過此歌，「呢排聽緊Sodagreen（蘇打綠）」。劉的父親劉鑾雄幾乎每日光顧福臨門酒家，劉鳴煒卻說：「我非常之唔鍾意（福臨門）。」
昨在節目上，有年輕人問劉鳴煒有否聽過麥浚龍的新歌，「如果堅持唔聽，好難同青年人溝通」，又藉同樣有父蔭的麥浚龍反問有家底的劉鳴煒，其家底有否窒礙他的仕途。

「家底好不一定成功」

劉鳴煒稱沒聽過麥浚龍的新歌：「麻煩青年人畀番個playlist我吖，我呢排聽緊Sodagreen，但（麥浚龍）嗰三首新歌我冇聽過。」他認為家底未必是年輕人的成功因素，因身邊有很多家底好的人，也不是特別成功：「社會上好多人家庭冇咁好，都出到個頭，最關鍵嘅因素都係自己，我覺得係要努力。」他說自己的身份未必是阻礙，惟有時出席活動時，獲貴賓式招呼和稱謂，有感浪費時間：「我想執垃圾都唔俾我執，或者儀式宣佈時，叫我『劉鳴煒乜乜乜乜』，後面好多英文字母title（職銜），嘥咗好多air time（節目時間）。」
劉鳴煒的父親劉鑾雄經常出入福臨門，劉鳴煒三次重申「非常之唔鍾意」這間酒家，「我由細到大都係非常之唔鍾意」。他又透露平日多喜歡突擊巡視集團旗下商場，「我唔想有預告，跟住要人洗晒太平地」。
■記者姚國雄