連續兩個星期六跑馬，上周六賽事，爆得幾甘，今次唔知又會點？爆與唔爆，與莫雷拉、潘頓；大摩、告東尼，這幾路人馬成績如何，有着相連關係。
大摩與方仔相反，沙田才是主場取分場地，報名馬多，質量亦好，今期除最受注目的「綠勇士」外，還有「甜統」、「駿馬翹楚」、「和諧氣氛」與「合拍飛龍」；後兩駒更是大摩今期兩匹王牌報名馬，顯然要確保做正選有得跑，「和諧氣氛」與莫雷拉最合拍，可是今次不受青睞，改配田泰安；反而「合拍飛龍」，屬莫雷拉上季少數無操、無騎過的大摩馬，今季對其態度，卻有180度轉變，季初未開鑼已接手，上次賽前更常親試，可惜停賽騎唔到。
今周一，「合拍飛龍」由莫雷拉操番，大摩安排在草地快磨，有別過去操練編排，果然，這課是認真考驗，末段快開到尾，辣磨了一課，原本也以為今朝只會出大圈輕鬆跳多課，不料卻只被安排內圈踱兩圈，變成無最後試跑！
睇完，即查以往紀錄，發現「合拍飛龍」乃大摩上季少數欠最後試跑都一再跑得好的馬，查完都放心好多，因睇馬實在比上次更吸引，好肯定今季轉四歲的「合拍飛龍」進步咗唔少；經上場開了氣，今次再攻泥地強項，改配莫雷拉，負磅、排檔等條件無大變，相對同場主要對手「電子鳳凰」、「星光勇將」及「威勢之寶」，跑法始終較主動，較安全。