疫症折騰 香港 咗幾個月，家陣上市公司開股東會多咗幾重防疫關卡，探熱、申報健康、隔開坐都不在話下，最大影響係Cut晒茶點小食，好多仲一早講明唔無伴手禮，搞到老友記們失去晒動力開會。好似恒隆集團同恒隆地產今朝搞股東會咁，第一場都仲有四十個股東到場，去到第二場就減到得返一半。

雖則棒場股東零落兼且生意環境窄窄地，但董事長陳啟宗心情又唔差喎。佢一開場就同股東講吓笑，完場仲有落台同大家傾吓計。不過，佢就話戴住 口罩 講野唔舒服，劈頭就問在場人士介唔介意佢除口罩開會，好在台上台下都保持到米半安全距離，所以唔見有股東耍手擰頭話怕怕，大家都由佢張嘴自由奔放咁主持會議，但包括阿囝陳文博在內嘅其他董事就嚴守紀律，口罩戴足全程。

笑笑口嘅陳啟宗仲有心情同股東分享吓佢疫症下嘅生活，話WORK FROM HOME查實都忙到飛起，同人網上視像開會八粒鐘搞到頸到痛。講講吓又話依家香港負能量太多，要同股東分享正能量，話武漢二百位恒隆同事響 疫情 下全Team都齊齊整整，當中有個女仔屋企人確診，後尾驗到佢原來已經有病毒抗體，即係感染後自己好返，所以佢決定請個女仔一家響疫情之後黎香港玩，到時仲會親自同佢哋食飯添。