兩子之父嘅黃秋生，近日被爆有20歲私生子William，囝囝生母Joyce日前向《蘋果》爆料斥秋生多年未有到英國探訪母子，但秋生嘅版本就話父子感情非常好，不時安排囝囝放假返港團聚，仲會帶佢見親友，所以秋生有私生子一事已成佢公開秘密。

今日有周刊報道，原來佢係岑建勳外甥女，跟秋生產子，分手後帶囝囝返英國居住。Joyce早年有兩段婚姻，現任老公係外籍人士，兩人育有一對子女。報道指Joyce曾打到秋生爆缸，據了解嗰次有人又用仔做「皇牌」發難，聲言棄仔，秋生怕嚇親囝囝，抱入懷中保護，Joyce發火出拳，結果秋生臉上眼鏡被打爆，傷及臉部。

另外，秋生對Joyce兩母子其實不錯，除早年給佢哋英國買屋居住，每月仲有足夠生活費，但據知有人扣起William一半生活費，還將房屋出售，母子搬去生活指數較低嘅郊區居住，William也轉到公立學校讀書。

秋生與William聯絡時，知道囝囝成為磨心，有時甚至連屋企都冇得返。而William今次返港，都係因為媽咪又發火，William喺香港最後一晚，已接到媽咪唔准返屋企短訊，內容係佢只剩番個背囊，呢次返英國已無家可歸，落機要租住酒店，然後到朋友家借宿。

對於報道指Joyce脾氣剛烈，秋生不願置評，只稱：「咪好囉，終於有個了結。」至於點解Joyce公開私事？秋生話：「佢話個仔幫我，所以趕個仔走，呢種愛好另類。」

問到William身份曝光後返英情況，秋生話：「阿仔返到英國，都返唔到屋企，要去酒店暫住。」秋生最睇唔過眼係William被趕出街：「虎毒不吃兒，佢咁做有幾錫個仔？」

秋生又指William好純好乖：「最多謝佢教到個仔咁斯文有禮貌，但佢放番心機喺自己家庭啦。」

William於兩個月後入大學，秋生會全力協助佢搵屋搬，佢覺得囝囝都大個，可以獨立理財，他亦不想兒子的資源「被錯用」。至於Joyce被爆係岑建勳外甥女，秋生話好多人都知，至於呢件事揚咗，見到岑建勳會唔會尷尬，秋生話：「佢舅父都知佢啲嘢，又唔係我爆。」

相關報道：
【多謝Joyce教好William】安排私生子財政獨立 秋生：唔想佢嘅資源被人用咗
https://bit.ly/2KkVo7P

【私生子成磨心】黃秋生爆舊愛Joyce：佢依家唔俾個仔返屋企
https://bit.ly/2KBkgEt

【為秋生誕下一子】Joyce長居英國 已嫁老外育兩兒
https://bit.ly/2lJ92CM

【獨家】結婚26年 黃秋生直認有私生子 今年20歲
https://bit.ly/2lCYTrj

【獨家】秋生私生子母親自稱「受夠喇」：佢同老竇做嘅都係一樣
https://bit.ly/2KqJEzD

精選娛聞，喺晒《娛果》
http://fb.com/appledailyent