噚晚Ana.R同Rosemary喺中環出席一個開幕活動，Ana.R就着咗條白色波點裙，但係腰位就有啲闊，仲就平底鞋，睇落好似有啲肚凸凸咁喎，問到佢係唔係有消息，佢就話只係條裙有啲闊，而平底鞋就因為今日要行好多路，所以先着平底鞋，不過0依家就有努力造人，仲希望喺2015有好消息公布。

問到Ana.R最近忙做咩，佢就話做緊啲形象顧問同模特兒嘅工作，又話最近工作放慢咗，但就覺得成行都係咁，仲講笑話見記者嘅機會少咗，不過放慢工作就唔係因為造人，佢話：「我自己也想忙的，保持忙碌自己感覺會好點，也想生小孩。」

Rosemary就同埋未婚夫Jason一齊現身，仲着到好性感，問到係唔係因為未婚夫一齊嚟，有未來老公保護，所以着得咁性感，佢就話：「是，他也很緊張和害怕，他今天是我的保護者。」

之後Rosemary又話喺活動之後，就會去一個工作嘅晚餐，因為Jason嚟緊會帶一個好大型嘅音樂節嚟到香港，問到婚禮搞成點，佢就話有啲慢，因為有好多人要配合，仲話0依家定咗12月頭，講到會唔會未婚生BB，佢就話Jason係想婚後先生，仲話冇特別想有，不過未婚夫就想經濟準備好啲先生BB，所以0依家都係努力做嘢。