華為副董事長、財務總監孟晚舟喺加拿大被捕，中美關係緊張，香港唔少紅色政界為表忠，紛紛話唔用美國貨要撐國貨，包括工聯會立法會議員陸頌雄，身為新民黨主席嘅保安局前局長葉劉淑儀仲話會轉用華為手機。而據八方所知，建制圈內唔少人如政協委員同立法會議員喺孟晚舟風暴未發生前都係用華為手機，一來梗係撐下「厲害了，我的國」，二嚟據聞華為手機影相質素確係唔差；之前有位工聯會地區幹事被人質疑P圖，扮有喺山竹後去清理塌樹，據知都係因為部華為手機影相實在太「高汁」。

葉劉今朝就喺港台節目話自己而家用緊三星，未來要換手機都會轉華為，「支持下呢間表現非常好嘅公司」，但表明一定唔會用蘋果，「覺得唔係好安全」，仲話除非冇取代品，否則所有通訊器材佢都會盡量避免用美國貨，話從安全理由去睇，「用所有美國貨都係危險嘅」，指美國當局有權監察手機，政治人通常有敏感通訊，所以用國產軟件硬件會安全啲。吓，中國監聽消息時有所聞，葉劉無理由唔知啩？又唔好忘記，葉劉都喺美國史丹福大學讀過書囉。

雖然新民黨主席葉劉話改用華為，但擔任該黨副主席、同樣都係前保安局局長嘅黎棟國就冇跟大隊，佢今日喺商台節目自爆係用小米手機，大讚小米「平、靚、正」；咁小米同華為都唔係「外來勢力」，都算政治正確嘅；而呢位港區全國政協委員，以前查實都用過蘋果手機㗎。

工聯會前立法會議員鄧家彪就係華為粉絲，有部工作用途嘅華為手機，大讚「佢（華為）影相真係好靚，速度好快」。佢同時都有部小米手機，主要用嚟收發email同WhatsApp，形容價廉物美，仲話兩部機夾埋，都平過另一個「著名嘅牌子」喎。