唱歌叻，唔一定講嘢叻，陳奕迅（Eason）就係一個好例子，早排發表完歌手缺席《勁歌》頒獎禮就冇獎嘅言論後，前日出席無綫台慶記者會時又突然爆肚，話無綫咁做係嘥錢，一切只係表面風光云云。唔知組合EO2嘅Otto係咪有樣學樣，影大合照嗰陣竟然豎中指贈興。
據聞無綫聽到Eason呢番說話之後唔多高興，噚日馮仁昭打畀Eason，佢話：「如果我嘅言論令TVB有任何誤會或不快，我深感內疚，並在此道歉。其實我噚日（即前日）所講嘅說話唔係針對任何人，我只係有感而發，針對唱片業正處於一個低潮時期嚟開吓玩笑，絕對唔係批評無綫，喺呢度我要再一次同TVB道歉！」

Otto手快過腦

至於無綫製作資源副總監樂易玲就話：「Eason呢個小朋友好用功，一向好幫TVB，相信佢係冇心講錯說話啫，佢已經同我哋解釋咗。至於Otto喺記者會舉起中指影大合照，我哋會了解吓件事，然後再同監製商量吓點處理。」Otto噚日出席新城活動時，就強調當時只係無心之失，佢話：「我隻手快過個腦，唔係有心做，本來想做個V字，如果有乜誤會就同TVB講聲對唔住。」