下個月有兩部重頭韓劇開播，仲要兩部都係改編自外國劇，當中包括OCN新劇《情婦》及KBS新劇《金裝律師》，《情婦》係改編自2008年播出嘅英劇，劇集大受歡迎，更於2013年重拍成美劇《Mistresses》。而《金裝律師》則改編美劇《Suits》。

下月28號首播嘅《情婦》由事隔6年再拍韓劇嘅《懷抱太陽的月亮》36歲女星韓佳人做女主角，韓佳人前年為演員老公延政勛誕下愛女後，一直專心湊女，早前才落實復出拍劇，日前劇組已公開首個預告，今日就公開韓佳人同一眾演員包括崔嬉序、李熙俊等人讀劇本嘅花絮照，產後復出嘅韓佳人狀態好好，靚媽復出都令觀眾十分期待。

至於由張東健同朴炯植兩大型男出演嘅《金裝律師》則會於下月25號開播，劇組亦都公開咗佢哋讀劇本嘅照片，劇中張東健飾演於有名律師事務所中工作嘅傳說級律師，朴炯植就飾演擁有超級記憶力嘅律師新人。

更多韓流，喺晒《娛果》
http://fb.com/appledailyent