韓國天團BIGBANG嘅29歲成員T.O.P本月初被爆曾於寓所吸食大麻而遭檢方起訴，令外界非常震驚，當時更有韓媒報道，擔心BIGBANG會因T.O.P嘅醜聞拖累，更有機會被剝奪擔任國家形象品牌「Creative Korea」嘅宣傳大使資格。不過BIGBANG似乎未受T.O.P醜聞所影響，日前隊長G-DRAGON（GD）更如常推出solo新碟，又去澳門開騷，8月更唱到香港亞博館，舉行兩場演唱會。

另外，太陽亦因為形象健康及正面，被任命為「2018年平昌冬季奧運會暨冬季殘奧會」宣傳大使，今日下晝太陽就出席於首爾中區太平路舉辦嘅宣傳大使委任儀式，接受委任。太陽穿上西裝現身，大晒陽光笑容，更透露會為平昌冬季奧運會創作新歌，令人期待。

至於T.O.P涉嫌吸食大麻案，將於下周四進行一審，不過未知T.O.P嘅身體狀況是否能夠出庭應訊。