港股噚日終於見到回吐,實情已經升咗咁多,都應該唞一唞。
小初打電話畀靚女經紀傾計,靚女問小初記唔記得6月份提過嘅元征科技(8196)?佢話公司呢幾日喺深圳搞汽車市場研討會,除咗客戶同傳媒外,據講亦廣邀證券界人士,所以今日佢亦會上去睇一睇。
搞到咁大陣仗,唔通為隻股造勢乎?睇番元征上星期公布嘅中期業績,盈利有成2599萬元人民幣,比去年同期上升三成,表現亦算唔錯。
靚女話,元征喺6月委任兩間台資行做配售代理,配售唔超過8000萬股新H股,配售價仍未知。當時元征股價大約1.40元水平,家陣已經升至1.78元,而配股一事好似尚未搞掂,估計隻股繼續有表現。
另外,雖然有芬佬減持,但好多工業股股價繼續創新高,好似福田實業(420)咁,噚日創出7.80元新高。經紀黃話,收市後再次傳出大股東配售舊股,唔知今日表現會如何?
慕容小初