李八方online︱警隊Facebook疑似草稿流出 叫admin Joey「低調」改po😅
蘋果日報 2020/12/14 21:42
香港警察李八方onlineFacebook
蘋果製圖
向來英文水平備受關注嘅香港警察，日前又有代表作，被「薯伯伯」發現喺11號嘅官方Facebook專頁，發表一段關於「一名警署警長初步確診2019冠狀病毒病」嘅帖文時，竟然喺文首加咗句「Joey, 可否幫我低調地改？」，後來警方更夠晒「低調」咁刪除相關文章，再發另一條類似帖文，並罕有加上英文繙譯，當然，已經冇咗「Joey, 可否幫我低調地改？」呢句。
左圖為警方原先帖文，首句是「Joey, 可否幫我低調地改？😅」；右圖為經修改的帖文，補上英文對譯。警方Facebook截圖
薯伯伯喺今次警方帖文睇出唔少玄機，包括警方Facebook原帖作者嘅英文水平可能唔多掂，要由一名叫Joey嘅管理人員額外加上英文繙譯，更指原帖作者唔單止英文不濟，「還擁有肥大的手指」，所以就將「草稿」文章直接發佈，結果出現「Joey, 可否幫我低調地改？😅」呢句令人尷尬嘅字句。
最令薯伯伯唔明嘅係，市民都唔期望香港警察一定要識英文，「為何這名管理員要求加英文時，卻要寫一句『可否幫我低調地改？』，做事鬼鬼祟祟，實在令人費解，有待分析其動機」。佢話政府若用公帑聘請專業人員管理Facebook，都出現如此尷尬嘅「低調」留言，難免令人質疑公帑係咪用得其所，「今天可以不小心披露另一低調管理人員的名字，將來會否不慎披露港区公安的其他資料？」
佢最後仲向英文叻嘅Joey埋手，「你可否低調地話我哋知，呢個咁高調叫你低調兼爆響你名嘅同事叫乜名？」
警認不慎錯發初稿 已提員工小心謹慎
警方今晚回覆《蘋果》查詢時承認，警隊社交媒體Facebook專頁管理人員於11日上午更新專頁內容時，曾不慎錯發初稿，發現後已立即更正，已提醒相關人員處理社交媒體內容時務必小心謹慎，但未有回應Joey是否警方Facebook管理人員。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！