台灣金馬獎會喺11月舉行頒獎禮，不過喺金馬獎就嚟公佈入圍名單前，台灣《Nownews今日新聞網》先搞咗個金驢獎，類似美國嘅金草莓獎，就係揀選全年最差勁嘅電影嘞！佢哋搵咗四個資深影評人喺今屆金馬獎報名嘅華語片當中，選出五部最驢電影、導演、男女主角，仲會選出最驢接吻、最驢動作等獎嘅入圍名單，得獎結果會喺金馬獎頒獎禮前公佈。

《未來警察》逐多獎

劉德華就憑《未來警察》入圍最驢男主角，其他角逐者仲有《實習大明星》嘅高凌風同《魚狗》嘅張雁明等，而王晶就憑《未》片入圍導演獎，《狼災記》嘅田壯壯、《實習大明星》嘅劉國昌都問鼎最驢導演獎。
最驢影片《未》同《實》片都有份入圍，其他入圍電影仲有甄子丹主演嘅《錦衣衛》、鄺盛導演嘅《魚狗》，呢部戲女主角劉心悠就入咗最驢女主角，《龍鳳店》嘅徐熙媛（大S）一樣入圍同劉心悠爭，睇嚟大S以後接戲要小心嘞！佢喺內地已經被封爛片天后，如果再一個唔該攞埋呢個最驢影后，想唔變票房毒藥都唔得。
大S日前喺北京出席好友安以軒嘅生日會時，佢同台灣男演員安鈞璨手拖手一齊出席，兩個人好鬼親密，大S一直都話好想拍拖，見到台灣幫，自然情不自禁格外熱情。